കിംഗ് ഖാന്‍ ഷാരൂഖിന്റെ ഹിറ്റ് ചിത്രങ്ങളിലൊന്നാണ് കരണ്‍ ജോഹര്‍ സംവിധാനം ചെയ്ത ‘കഭി അല്‍ വിദ നാ കെഹ്ന’. ഈ ചിത്രത്തില്‍ ഷാരൂഖ് ഖാന്റെയും പ്രീതി സിന്റയുടെയും മകനായെത്തിയ കുസൃതിക്കുട്ടിയെ ആരും അത്ര പെട്ടെന്ന് മറക്കില്ല. അഹ്‌സാസ് ചന്ന എന്ന പെണ്‍കുട്ടിയാണ് ചിത്രത്തില്‍ ആണ്‍കുട്ടിയായെത്തിയത്. നാലാം വയസ്സില്‍ തന്റെ അഭിനയ ജീവിതം തുടങ്ങിയ അഹ്‌സാസ് ടെലിവിഷനിലെയും വെബ് ഷോകളിലെയും മിന്നും താരമാണിന്ന്.
ടിവിഎഫിന്റെ ജനപ്രിയ വെബ് സീരിസായ കോട്ട ഫാക്ടറിയിലും അഹ്‌സാസ് ഉണ്ടായിരുന്നു. 2004 ല്‍ ‘വാസ്തുശാസ്ത്ര’ എന്ന ചിത്രത്തില്‍ സുസ്മിത സെന്നിന്റെ മകനായിട്ടായിരുന്നു അഹ്‌സാസ് സിനിമയില്‍ അരങ്ങേറ്റം കുറിച്ചത്. ഈ ഹൊറര്‍ ചിത്രം ഏറെ ശ്രദ്ധിക്കപ്പെട്ടു. തുടര്‍ന്ന് ‘കഭി അല്‍ വിദ നാ കെഹ്ന’യിലും അഹ്‌സാസ് ആണ്‍കുട്ടിയായെത്തി. ‘മൈ ഫ്രണ്ട് ഗണേശ’, ‘ഫൂന്‍ക്’ തുടങ്ങിയ ചിത്രങ്ങളിലും ബാലതാരമായി തിളങ്ങിയ അഹ്‌സാസ് പിന്നീട് ടെലിവിഷന്‍ ഷോകളിലൂടെയാണ് ശ്രദ്ധേയയായത്.
‘വാസ്തുശാസ്ത്ര’, ‘കഭി അല്‍ വിദ നാ കെഹ്ന’ എന്നിവയ്ക്കു പുറമെ ‘മൈ ഫ്രണ്ട് ഗണേശ’യിലും ആണ്‍കുട്ടിയുടെ വേഷത്തില്‍ തന്നെയാണ് അഹ്‌സാസ് എത്തിയത്. പഞ്ചാബി സിനിമകളുടെ നിര്‍മ്മാതാവായ ഇക്ബാല്‍ ചന്നയുടെയും ടെലിവിഷന്‍ താരമായ കുല്‍ബീര്‍ കൗറിന്റെയും മകളാണ് അഹ്‌സാസ്. എന്തായാലും ഈ സംഗതി അറിഞ്ഞ് പലരും അമ്പരന്നിരിക്കുകയാണ് ഇപ്പോള്‍.
